Inngangur

Børn hava nógvar førleikar og setir hetta krøv til námsfrøðiliga innihaldið í gerandisdegnum. Vit síggja børnini sum sjálvstøðug menniskju, við rætti til at ávirka sítt egna lív. Børnini eru virknir viðskaparar av nýggjari vitan og tey skulu fáa høvi at skapa meining og innihald í egnum menningar- og lærutilgongdum. 

Okkara námsfrøðiliga uppgáva er at fremja barnsins rættindi til læru og menning, til avbjóðingar og dirvi at seta undrandi og forvitnisligar spurningar. Starvsfólkini eiga at taka støði í barnsins sannroyndar- heimi, áhuga motivatión og drívmegini í at søkja sær vitan og menna sær førleikar. Hetta soleiðis at børnini kunna fáa álit og innlit í egnan førleika, og harvið læra seg at læra. 

Stórur týdningur er í námsfrøðiligu rúmunum, bæði innandura og uttandura, og eiga hesi at leggja upp til eitt námsfrøðiligt virkið, sum tekur støði í lærutilgongdinum eins og í møguleikanum hjá børnunum at skapa seg sjálvan í samspæl við onnur, og soleiðis fáa ávirkan á egnan gerandisdag. Tað er í rúmunum og í felagsskapinum við onnur, at sjávsálit, sjálvsfatan, samstarvsevni, ábyrgd og samkensla fáa møguleika at vaksa. 

Børnini hava rætt til eitt umhvørvi við ymiskum fjølbroyttum møguleikum og tilfari, ið gevur íblástur til eitt áhugavert virksemi. Námsfrøðilig rúm leggja upp til bæði undran, hugsavnan, samrøðu og spæl.

 

Námsætlanin byggir á tey barnarættindi, sum eru staðfest í Barnarættindasáttmálanum og sum eiga at síggjast aftur í námsfrøðiliga virkseminum á dagstovninum. 

Tískil kjakast leiðari og starvsfólk javnan um barnaáskoðan, javnstøðu, fólkaræði og inklusión.  

Barnaáskoðan: Hvør er okkara barnaáskoðan? Hvussu mennast og læra børn best? Hvørji rættindir hava børn? Hvussu tryggja vit teimum teirra rættindir? Hvussu sæst hetta á stovninum?

Javnstøða: Hvussu sæst javnstøða á stovninum? Hvussu sæst kynsmedvit? Í hvønn mun kunnu vit javnseta børn og vaksin? Hvat vald hava tey vaksnu, og hvussu verður tað umsitið á stovninum?

Fólkaræði: Hvat skilja vit við fólkaræði, og hvussu læra børnini um síni rættindir og skyldur? Hvussu verður fólkaræði útint á stovninum? Hvussu tryggja vit, at børnini hava ávirkan á egið lív og gerandisdag? Nær hava tey høvi at luttaka í livandi, javnbjóðis fólkaræðisligum orðaskifti? 

Inklusión: Hvussu tryggja vit, at børnini hava atgongd til og eru partur av einum barnafelagsskapi? Hvat kann forða fyri, at øll eru javnbjóðis luttakarar? Hvussu skapa tey vaksnu eina inkluderandi mentan á stovninum? 

Persónligir førleikar

Øll børn hava rætt til at:

•menna sín samleika, sjálvskenslu og sjálvsvirði
•menna undran, forvitni og áhuga fyri at spæla og læra
•menna sína sjálvstøðu, álitið á egin evni og egnar fortreytir
•menna dirvið at siga frá egnum kenslum og meiningum
•menna førleikan at kunna njóta friðin og hvíla

Sosialir Førleikar

Øll børn hava rætt til at:

•  Vera virkin, spæla og taka ábyrgd saman við øðrum

•  Hava ávirkan og kenna seg sum partur av einum týdningarmiklum felagsskapi

•  Menna síni evni til at virka í bólki, at knýta vinabond, at klára tvístøður og at skilja rættindi og  skyldur

Skapandi evni

Øll børn hava rætt til at:

•  menna síni skapandi evni, njóta at taka lut í skapandi virksemi og gleðast um tað, tey skapa ígjøgnum æstetiskar lærutilgongdir
•  menna sítt hugflog og førleikan at gera hugskot til veruleika?
•  kunna seg um og menna fjølbroyttar kreativar hættir at úttrykkja seg, (eitt nú myndir, formar, rørslur, sang, tónleik, sjónleik ella dans)

menna ymisk handverk

Heilsa og rørsla

Øll børn hava rætt til at:

•  menna sínar rørslur og kropsfatan

•  njóta at vera virkin og brúka sín kropp og sínar sansir

•  kenna týdningin av góðari heilsu, dygdargóðum kosti, reinføri og vælveru

Mál og samskifti

Øll børn hava rætt til at:

•  menna sítt mál og sín samskiftisførleika við fjølbroyttum møguleikum at úttrykkja seg

•  menna sín áhuga fyri myndum, teksti og ymiskum miðlum

•  læra at orða seg, samrøða og grunda

•  menna eitt fjølbroytt orðatilfeingi

Náttúra, umhvørvi og tøkni

Øll børn hava rætt til at:

•  menna sín alsk fyri náttúruna og kanna og kunna seg um vøkstur og djóralív og onnur fyribrigdi í náttúruni

•  menna sína tilvitsku fyri ringrásini í náttúruni, fyri umhvørvið og vistfrøði og fyri hvussu menniskja, náttúra og samfelag hava ávirkan á hvørt annað

•  granska og menna sína fatan fyri støddfrøðiligum og náttúruvísindaligum hugtøkum, tølum, mongdum, mynstrum og kunna seg í tíð og rúmd

•  menna áhugan fyri tøkni og fyri ymiskum alis- og evnisfrøðiligum tilfeingi

Siðir og mentan

Øll børn hava rætt til at:

•  fáa innlit í og menna føroyska mentan, søgu og samleika

•  kenna føroyska siðvenju, høgtíðir og matmentan

•  gerast alment mentaði

•  menna kensluna og virðingina fyri øðrum mentanum